Не смееме да дозволиме Заев, Груби, Ден Дончев, Филипче, како порано, и покрај сомневањата за криминали, да шетаат слободно, велат од ВМРО-ДПМНЕ

По апсењето на директорот на Агенцијата за финансиска поддршка во земјоделството и руралниот развој, ВМРО-ДПМНЕ реагираше со став дека партијата нема да толерира незаконски постапки и дека законот мора да важи за сите подеднакво.„ВМРО-ДПМНЕ ги повикува надлежните институции да го истражат случајот. Нема да толерираме неправилности и одговорност мора да има. ВМРО-ДПМНЕ нема да ги толерира неправилностите и девијантните однесувања на поединци за кои има сомнение дека го прекршиле Законот. Законот за сите е ист,“ стои во реакцијата на партијата.Од партијата порачуваат дека секој што ќе биде фатен во корупција или криминал и за кого ќе има докази, мора да одговара, без разлика на функцијата или политичката припадност.„Не смееме да дозволиме општеството повторно да потоне во мрак, како порано, кога луѓе како Заев, Љупчо Николовски, Груби, Филипче, Перпарим Бајрами, Ден Дончев, Рашковски и слични на нив, за кои има основани сомневања или пресуди за сторен криминал, слободно шетаа по улиците.“Од ВМРО-ДПМНЕ испратија апел до институциите – Обвинителството, МВР и Финансиската полиција – целосно да го истражат случајот и да постапат во согласност со законските процедури.

Македонија | пред 6 месеци

Левица: Наместо нови автобуси во ЈСП – нови автобуси за приватните превозници

Партијата Левица остро реагираше на најавата на градоначалникот на Скопје, Орце Ѓорѓиевски, дека од понеделник ќе започнат да сообраќаат 55 нови автобуси на приватните превозници, оценувајќи дека тоа е уште едно „импровизирано решение“ на штета на јавниот интерес.„Наместо нови автобуси во ЈСП, нови автобуси за приватните превозници! Четири години ВМРО-ДПМНЕ го држеше Советот на Град Скопје во блокада и не гласаа за набавка на нови еко автобуси, поради што јавниот превоз колабираше, а градот западна во хаос. Денес, кога ја имаат целата власт, се обидуваат да изиграат спасители и најавуваат нови автобуси од приватници, наместо системско јакнење на ЈСП,“ стои во соопштението на партијата.Левица обвинува дека ваквиот потег отвора сомнеж дека се подготвува терен за приватизација на јавните претпријатија, наместо за нивно реформирање и модернизација.„Се поставува прашањето зошто приоритет им е набавка на автобуси за приватниците, а не за Јавното сообраќајно претпријатие? Истите тие што беа против купување нови автобуси, сега носат импровизирани решенија. Истиот двоен стандард го гледаме и со Градска хигиена – Скопје тонаше во смет поради нивните блокади, а сега се сликаат со метли како да го чистат туѓиот неред,“ порачаа од партијата.Од Левица додаваат дека нивните советници во Советот на Град Скопје ќе се спротистават на секоја одлука што го фаворизира приватниот интерес пред јавниот и нема да дозволат, како што велат, „дополнително уништување на јавните претпријатија.“„Ние сме за силно, јавно и модерно ЈСП, а не за приватизација и политички маркетинг,“ се наведува во соопштението на Левица.

Скопје | пред 6 месеци

Девојка обвинета за сообраќајка во која едно лице загина, избегала од Македонија – распишана потерница

Девојката Викторија З. која во ноември минатата година предизвика тешка сообраќајна несреќа на патот Кавадарци – Неготино, во која загина едно лице, а тројца беа повредени, побегнала од Македонија додека траел судскиот процес против неа.Станува збор за 19-годишна обвинета, која не била предмет на никакви мерки на претпазливост – немала забрана за напуштање на државата, ниту ѝ бил одземен пасошот, поради што слободно ја напуштила земјата.Од Обвинителството за „Скопје1“ ја потврдија информацијата дека се известени од судот дека обвинетата е недостапна за органите на прогонот, по што е распишана потерница.Судскиот процес, и покрај нејзиното бегство, може да продолжи во нејзино отсуство, а доколку биде осудена, казната ќе може да ѝ се изрече и издржи по нејзиното пронаоѓање.Несреќата се случила во ноември 2024 година кога автомобил управуван од девојката излетал од патот и удрил во друго возило, при што загинало едно лице, а три биле повредени.

Македонија | пред 6 месеци

(Видео) Се менува грдата слика во реката Вардар: механизација влезе да расчисти во центарот на Скопје

Со багери и механизација денеска започна расчистувањето на коритото на реката Вардар, кое во изминатите години беше преполно со пластика, отпад и наноси, најмногу во делот кај галиите во центарот на Скопје.Акцијата ја спроведува Јавното претпријатие „Улици и патишта“ – Скопје, чиј тимови работат машински и рачно на терен.„Продолжуваат активностите со машинско и рачно чистење на коритото и косините на река Вардар. Екипи на ‘Улици и патишта’ Скопје и денес се активни. Рачно се отстранува насобраната пластична амбалажа и смет од косините, а багери и друга механизација го расчистуваат кабестиот и земјаниот материјал во централниот дел на кејот,“ соопштија од претпријатието.Во акцијата се вклучени сите расположливи екипи и машини на претпријатието, а чистењето ќе продолжи и наредните денови сè до целосно расчистување на кејот на Вардар.Реката Вардар со години претставува едно од најзагадените градски подрачја, особено поради отпадот што се задржува околу галиите и мостовите, а оваа акција е дел од пошироката кампања за генерално чистење на Скопје која ја најави градоначалникот Орце Ѓорѓиевски.

Скопје | пред 6 месеци

Четворица малолетници малтретирале врсник и објавиле видео на „ТикТок“

Полицијата во Струмица го расчисти случајот во кој четири малолетни лица насилно се однесувале кон нивен врсник, а видеото од инцидентот го објавиле на социјалната мрежа „ТикТок“.Според информациите од МВР, 42-годишен жител од струмичко пријавил дека пред околу една недела неговиот син бил жртва на насилство од страна на четири малолетници. Настанот бил снимен и споделен јавно на интернет.По пријавата, полицијата од СВР Струмица презела мерки за расчистување на случајот, а инволвираните малолетници биле повикани во станица каде биле извршени службени разговори во присуство на нивните родители.За настанот биле известени Основното јавно обвинителство Струмица и Центарот за социјални работи Струмица.Од Министерството за внатрешни работи информираа дека по целосно документирање на случајот ќе биде поднесен соодветен поднесок по Законот за правда за децата.

Македонија | пред 6 месеци

Украински дронови ја погодија електричната трафостаница во северна Русија – Москва тврди дека соборила над 80 беспилотни летала

Три украински дронови во текот на ноќта ја погодиле електричната трафостаница во руската област Вологда, соопшти регионалниот гувернер Георгиј Филимонов.Според него, оштетувањето сè уште се проценува, но снабдувањето со електрична енергија во регионот не е прекинато. Областа Вологда, која се наоѓа северно од Москва, околу 1.900 километри од границата со Украина, досега не била редовна цел на украински напади.Филимонов ја објави информацијата на својот Телеграм-канал, наведувајќи дека екипите на терен работат на санација на последиците од нападот.Во последните месеци, украинските беспилотни летала често ги напаѓаат руските енергетски и индустриски објекти, особено во регионите Белгород, Брјанск, Курск и Саратов.Градот Саратов, кој се наоѓа на реката Волга, веќе неколку пати бил цел на украински дронови, иако е оддалечен повеќе од 600 километри од украинската граница.Москва: Соборени над 80 дроновиРуското Министерство за одбрана соопшти дека противавионската одбрана соборила повеќе од 80 украински дронови, од кои најголемиот дел над регионите што граничат со Украина.Според соопштението, ниеден од нападите не предизвикал сериозни штети или жртви, иако руските извори признаваат дека дел од инфраструктурата е погодена.Украинските власти не ја коментираа официјално операцијата, но веќе извесен период Киев води интензивна кампања со дронови насочена кон руските енергетски, воени и индустриски цели длабоко во внатрешноста на Русија.

Свет | пред 6 месеци

Зошто автомобилот одеднаш ви троши повеќе гориво? Проблемот можете да го решите за малку пари

Кога потрошувачката на гориво нагло ќе се зголеми, проблемот најчесто не е во бензинската пумпа, туку во самиот автомобил. Причините можат да бидат различни – од начин на возење до технички дефекти.Најпрво проверете ги гумите: ако се премалку напумпани, автомобилот троши повеќе гориво. Потоа филтерот за воздух – кога е затнат, моторот не добива доволно воздух и согорува повеќе гориво. Исто така, проверете дали сопирачките „заглавуваат“, бидејќи тоа создава дополнителен отпор при возење.Неправилно моторно масло и неисправен систем за ладење можат да ја зголемат потрошувачката и до 15%. Ламбда сондата, сензорот за проток на воздух или валканите инјектори често се причина за „невидливо“ зголемување на трошоците.Не заборавајте ги и свеќичките – ако се истрошени или валкани, согорувањето е неефикасно и моторот троши повеќе. Слично важи и за EGR вентилот – ако е заглавен, смесата не е правилна и потрошувачката расте.Најчести решенија: проверете ги гумите, сопирачките, филтерот за воздух, свеќичките и сензорите. Мала неисправност може да предизвика голем трошок ако се игнорира. Редовната контрола и навремен сервис се најдобра заштита – за мотор што работи ефикасно и троши онолку колку што треба.

Магазин | пред 6 месеци

Најстудено утрово во Берово, Маврови Анови и Лазарополе – 5 степени, најтопло во Демир Капија со 13

Утрово најниската температура во земјава е измерена во Берово, Маврови Анови и Лазарополе, каде термометарот покажал 5 степени Целзиусови, додека најтопло било во Демир Капија – 13 степени.Во Крушево температурата изнесувала 7, во Крива Паланка 8, а во Тетово, Претор и Прилеп се измерени 9 степени.Во Скопје, Охрид, Велес, Виница, Кавадарци и Струмица утринската температура достигнала 10 степени, во Битола 11, а во Штип и Гевгелија 12 степени.Во изминатите 24 часа најмногу врнежи се забележани во Пожаране и на Попова Шапка – по 32 литри на метар квадратен, следуваат Маврови Анови и Крушево со по 23 литри, Тетово со 21, Претор со 20, Лазарополе со 14, а во Гевгелија се измерени 11 литри.Помали количества дожд имало во Битола и Тополчани (по 9 литри), Скопје – Зајчев Рид (6 литри), Ѓуриште и Пожар–Радовиш (по 5), Прилеп, Велес и Скопје–Петровец (по 4 литри), додека најмалку дожд наврнал во Штип и Кавадарци – по 1 литар на метар квадратен.Денеска времето ќе биде променливо облачно со повремени локални врнежи од дожд, а на одделни места врнежите ќе бидат поројни и пообилни, со над 30 литри на метар квадратен за 24 часа, проследени со засилен ветер и ретка појава на грмежи. Ќе дува умерен до засилен јужен ветер, а долж Повардарието од југоисточен правец.Максималната температура ќе се движи меѓу 12 и 17 степени Целзиусови.

Македонија | пред 6 месеци

Мажи од Македонија, Грција и Косово заглавија: се забавувале додека кучиња се јаделе меѓу себе до умирање

Основното јавно обвинителство Битола поднесе обвинение против четворица лица – грчки и косовски државјанин, како и двајца македонски државјани – за кривично дело „убивање и мачење животни“ по член 233 став 3 во врска со став 1 од Кривичниот законик.Според обвинението, на 1 ноември во селото Црнеец, во близина на Стрежево, обвинетите заради користољубие организирале и спровеле борба меѓу кучиња од расите „пит бул“ и „американски стафорд“, при што животните биле грубо злоупотребени и изложени на непотребни маки.Првообвинетиот, државјанин на Грција, ја организирал борбата во дворот на семејната куќа на второобвинетиот косовски државјанин, кој претходно подготвил импровизиран ринг. Настанот го следеле и лица од Косово, Грција и Македонија, кои полицијата ги затекнала на лице место и кај кои биле пронајдени пари во евра и денари, за кои се верува дека биле наменети за обложување на борбата.Како резултат на насилниот настан, кучето од расата „пит бул“ се здобило со тешки повреди, меѓу кои угризни рани, повреди на главата и знаци на трауматски шок.Истражните органи утврдиле дека се работи за организирана група која повторувала вакви борби, бидејќи во дворот биле пронајдени траги од претходни борби и лекови за третман на повредени кучиња.Обвинителството достави предлог за продолжување на мерката куќен притвор за двајцата македонски државјани, додека грчкиот и косовскиот државјанин се во бегство.„Доколку не бидат обезбедени до почетокот на судската постапка, обвинителството ќе предложи да им се суди во отсуство,“ соопштија од ОЈО Битола.

Македонија | пред 6 месеци

Поддршка од Северина за Дијана Хрка, мајката на загинатиот Стефан, која со штрајк со глад бара правда

Хрватската ѕвезда Северина за време на концертот во Загреб ѝ испрати поддршка на Дијана Хрка, мајката која загуби син во падот на настрешницата во Нови Сад и сега штрајкува со глад барајќи правда.Од почетокот на студентските протести во Србија, Северина отворено ги поддржува блокадите и испраќа пораки за поддршка на речиси секој концерт.Како што објави Нова.рс , таа ги потсети присутните дека во центарот на Белград, мајката на лицето кое почина по падот на настрешницата на железничката станица во Нови Сад, штрајкува со глад.Публиката одговори на ова со овации и громогласен аплауз.„На 400 километри источно од мене, има мајка која штрајкува со глад веќе пет дена. Се вика Дијана Хрка, а нејзиниот син Стефан почина под железничкиот надвозник во Нови Сад. Оваа мајка штрајкува со глад затоа што веќе една година бара вистина и правда. Ве молам, дајте ѝ силен аплауз. Дијана”, рече Северина.

Свет | пред 6 месеци

Бугарија ја презеде контролата врз рафинеријата на Лукоил

Бугарскиот парламент изгласа закон со кој рафинеријата на руската групација Лукоил во Бургас, на Црното Море, ја стави под државна контрола.Тоа е последица на американските санкции воведени во октомври против рускииот нафтен гигант. Ова ја загрижи бугарската влада дека руската рафинерија, со промет од 4,68 милијарди евра во 2024 година, ќе мора да се затвори поради санкциите.Американските санкции, кои ќе стапат во сила на 21 ноември, ќе доведат до прекин на работењето на рафинеријата, поради одбивањето на сите страни да вршат плаќања на компаниите што припаѓаат на Лукоил.Лукоил индиректно поседува 99,85 проценти од рафинеријата Нефтохим во Бургас.Одлуките поврзани со продажбата ќе мора претходно да бидат одобрени од Државната агенција за национална безбедност, а средствата од трансакциите ќе се депонираат на специјална сметка во Бугарската развојна банка.Бугарската влада ќе назначи специјален менаџер за управување со компанијата. Тој ќе биде овластен, со одобрение на Владата, да продава акции по проценка на пазарот, одлучија бугарските пратеници.

Свет | пред 6 месеци

ЛДП бара владините повереници во четирите општини да не можат да се кандидираат за градоначалници

Либерално-демократската партија подготвува измени на Изборниот законик со кои ќе бара поверениците што Владата ќе ги назначи во општините во кои поради немање цензус не се избраа градоначалници, да не може да се кандидираат кога ќе бидат повторно организирани избори.,,Овие измени ЛДП ќе ги предложи за да нема никој нефер предност пред останатите кандидати за градоначалници, но и да се намали можноста за евентуални злоупотреби и несовесни работења на поверениците во периодот додека не се одржат повторените избори. Оваа предлог мерка доаѓа по прифаќањето на предлогот на ЛДП за враќање на референдумското отповикување на градоначалници во Законот за локална самоуправа, кој веќе се наоѓа во Собранието и со кој после 30 години од укинувањето на референдумот, ќе се стави крај на заштитата на неефикасните и нетранспарентни функционери”, велат од ЛДП.Според партијата, доколку се усвојат измените на Изборниот законик и се воведе ограничувањето за поверениците ќе се овозможат фер услови за коректен политички натпревар, ослободен од било какви сомнежи за дополнителни злоупотреби и политички влијанија.Во општините Гостивар, Врапчиште, Маврово и Ростуше и Центар Жупа не се постигна неопходната излезност во првиот круг и по 60 дена изборите почнуваат од почеток. Спикерот Гаши чека толкување и договор од кога течат роковите.

Македонија | пред 6 месеци

Свикана втората седница на Советот на Општина Охрид – со дополнување

Врз основа на член 39 од Законот за локалната самоуправа („Сл.весник на РМ“ бр.5/02) и член 26 од Статутот на општина Охрид („Сл.гласник на општина Охрид“ бр. 8/2007, 01/08, 10/10, 05/11, 09/14,14/14, 10/19 и 15/20), Претседателот на Советот донесува:Р Е Ш Е Н И ЕЗА СВИКУВАЊЕ НА ВТОРАТА СЕДНИЦАНА СОВЕТОТ НА ОПШТИНА ОХРИДЈА СВИКУВАМ втората седница на Советот на општина Охрид на ден 12.11.2025 година (среда) со почеток во  09,00 часот.  Седницата ќе се одржи во зградата на општина Охрид.За седницата го предлагам следниот:Д Н Е В Е Н   Р Е ДУсвојување на Записникот од првата конститутивна седницаПредлог Решение за формирање Статутарно-правна Комисија.Предлог Решение за формирање Комисија за финансии и буџет.Предлог Решение за формирање Комисија за јавни и комунални дејности.Предлог Решение за формирање Комисија за урбанизам.Предлог Решение за формирање Комисија за општествени дејности.Предлог Решение за формирање Комисија за туризам и локален економски развој.Предлог Решение за формирање Комисија за заштита на животната средина.Предлог Решение за формирање Комисија за млади и спорт.Предлог Решение за формирање Комисија за месна самоуправа.Предлог Решение за формирање Комисија за одбележување празници и манифестации и доделување награди и признанија.Предлог Решение за формирање Комисија за еднакви можности меѓу мажите и жените.Дополнување на дневниот ред за 2-рата седница на Советот на општина Охрид со следните две точки:Предлог одлука за констатирање престанок на мандат на член во Советот на општина Охрид.Предлог одлука за верификација на мандат на член во Советот на општина Охрид.СОВЕТ НА ОПШТИНА ОХРИДПретседателПерчо БожиновскиОПШТИНА ОХРИДЛОКАЛНА САМОУПРАВАБрој 08-14956/105.11.2025 год.О х р и д

ОО | пред 6 месеци

Орбан: САД ѝ дадоа на Унгарија целосно изземање од санкции за руската енергија

Унгарскиот премиер Виктор Орбан изјави во Вашингтон дека неговата земја постигнала договор со САД, со кој Унгарија добила потполна и неограничена изземеност од американските санкции за користење руска енергија преку гасоводот „Турски тек“ и нафтоводот „Дружба“.Орбан, кој се сретна со американскиот претседател Доналд Трамп, по средбата одржа заедничка прес-конференција со шефот на унгарската дипломатија Петер Сијарто, нагласувајќи дека овој договор ја „спасил унгарската политика на ниски режиски трошоци“.„Од американскиот санкциски систем сега успеавме да се извлечеме, но со европските санкции допрва ќе водиме борба“, рече Орбан, додавајќи дека Унгарија повеќе не мора да стравува дека најавените американски мерки против руските енергенти ќе се применат и врз неа.Сијарто потврди дека и други држави се обиделе да добијат сличен изземок.„Да санкциите стапеа на сила, сметките на домаќинствата драстично ќе пораснеа. По денешната средба, таа опасност повеќе не постои за Унгарија“, изјави тој.Еден од најважните делови на договорот, според Орбан, се однесува на гасоводот „Турски тек“ и нафтоводот „Дружба“, преку кои Унгарија увезува руски гас и нафта.„Овие две стратешки линии добија изземок без временско ограничување. Со тоа успеавме да ја одбраниме политиката на пониски трошоци за граѓаните“, истакна Орбан.Тој прецизираше дека без постигнатиот договор, сметките за струја и греење во декември би биле двојно повисоки.Орбан објави и дека САД повлекле сè што било проблематично околу изградбата на нуклеарната електрана „Пакс 2“, проект кој се реализира во соработка со Русија.„Во врска со завршувањето на ‘Пакс 2’ нема повеќе американски сомнежи. Такви санкции во иднина нема да бидат воведени,“ рече Орбан.Американската страна, според Будимпешта, потврдила дека нема да воведува ниту да одржува санкции кои би ја попречиле изградбата на нуклеарката.Иако Унгарија успеала да обезбеди изземок од американските мерки, санкциите на Европската Унија остануваат, а Орбан најави „борба во Брисел“.Тој потсети дека се спротивставува на планот на ЕУ до крајот на 2027 година постепено да се отфрлат руските енергенти, оценувајќи дека станува збор за одлука што може да се донесе со квалификувано мнозинство, без согласност на сите членки.Трамп: „Некои земји зборуваат едно, а купуваат руско гориво“Американскиот претседател Доналд Трамп коментираше дека многу европски држави и натаму купуваат руска нафта, иако тврдат дека не зависат од неа.„Некои европски земји немаат проблем каков што има Унгарија, а сепак купуваат многу руска нафта. Тоа ме вознемирува повеќе,“ рече Трамп.Орбан, пак, повтори дека географијата е реалност и дека алтернативите, како снабдувањето преку Хрватска, имаат премал капацитет за да ги задоволат енергетските потреби на Унгарија.

Свет | пред 6 месеци

Притвор за директорот на Агенцијата за финансиска поддршка Илија Стоилев и уште три лица – петтата осомничена во куќен притвор

Кривичниот суд – Скопје го прифати предлогот на Обвинителството за гонење на организиран криминал и корупција (ОЈО ГОКК) и одреди мерка притвор од 30 дена за директорот на Агенцијата за финансиска поддршка во земјоделството и руралниот развој (АФПЗРР), Илија Стоилев, и уште три лица осомничени во случајот за поткуп поврзан со програмата ИПАРД. Петтата осомничена е ставена во куќен притвор.„Судија на претходна постапка, по произнесување на петтемина осомничени кои попладнево беа спроведени во судот, донесе решенија со кои за Џ.Н., А.Ф., Ф.Ф. и И.С. го прифати предлогот на ОЈО ГОКК и на сите четворица им определи мерка притвор од 30 дена заради опасност од бегство, влијание врз сведоци и можност за повторување на делото. За петтоосомничената Ј.К. судот го прифати променетиот предлог на јавниот обвинител и ѝ определи мерка куќен притвор,“ соопштија од Судот.Притворот следува по акцијата на ОЈО ГОКК и МВР, во која беа уапсени пет лица, меѓу кои и Стоилев. Според Обвинителството, постои основано сомнение дека управител на приватно правно лице му понудил поткуп од 50.000 евра на директорот на Агенцијата, за да потпише договор за користење финансиски средства иако фирмата не ги исполнувала условите од јавниот повик бр. 01/24 за ИПАРД мерка 3.Во акцијата биле уапсени и даночен референт од УЈП, како и државен службеник од Министерството за земјоделство, кои се сомничат дека посредувале во поткупот. При претресот биле пронајдени и одземени 400 евра, дел од ветениот поткуп.„Иако правното лице на првоосомничениот не ги исполнувало условите од јавниот повик, директорот, по ветување за подарок во износ од 50.000 евра, го потпишал договорот и примил дел од средствата,“ соопштија од Обвинителството.Портпаролот на МВР, Гоце Андреевски, потврди дека постои основано сомнение за повеќе кривични дела – давање поткуп, давање награда за противзаконито влијание, примање награда и примање поткуп.Премиерот Христијан Мицкоски ја поздрави акцијата, нагласувајќи дека Владата нема да толерира вакво однесување.„Јас во неколку наврати сум кажал дека таков тип на девијантно однесување нема да се толерира. Откако имаше дојави, се случи акцијата. Од овој момент случајот е во рацете на Обвинителството и судовите,“ изјави премиерот.Директорот Илија Стоилев, кој неодамна во интервју за ТВ24 уверуваше дека „врски фаќање нема“ и дека постапките во Агенцијата се целосно контролирани, сега се наоѓа зад решетки.Во минатото Стоилев бил претседател на Советот на Општина Свети Николе во два мандата, директор на Народниот музеј во градот, како и раководител на подрачната единица на Министерството за земјоделство.

Македонија | пред 6 месеци

Николовски: Системот на злоупотреби што го создаде Владата ја уништи довербата – земјоделците повторно ќе ја плататат цената

„Колку пати алармирав и предупредував дека во Агенцијата за финансиска поддршка на земјоделството и руралниот развој се создава систем на клиентелизам, влијанија и злоупотреби?“, порача поранешниот министер за земјоделство, Љупчо Николовски, реагирајќи по апсењето на директорот на Агенцијата при земање мито.„Јавно укажував дека ИПАРД 3 ќе крахира, дека со вакви практики се загрозува кредибилитетот на државата пред Европската комисија и се става под ризик целата програма вредна околу 100 милиони евра – пари наменети за развој на македонското земјоделство“, изјави Николовски.Според него, денешниот скандал е директна последица на политичко поставување на луѓе без интегритет и без компетенции.„Ова не е изолиран инцидент, туку резултат на владеење кое ги заменува вредностите и професионалноста со партиска послушност“, нагласи тој.Николовски потсети дека за време на неговиот мандат ИПАРД 2 програмата беше 100% искористена, со 2.369 договори и реализирани инвестиции.„Срамно е целиот тој успех и довербата што ја изградивме со Европската унија да биде уништена за само една година поради корупција и лични интереси“, додаде тој.Тој предупреди дека постои реална опасност Европската комисија да ја стопира ИПАРД 3 програмата за Македонија, што би значело блокада на сите исплати и нови повици.„Ако се случи тоа, земјоделците повторно ќе бидат жртви на корупцијата и неспособноста на оваа власт“, порача Николовски.Во завршницата, поранешниот министер побара итна одговорност и расчистување со злоупотребите:„Време е за целосна одговорност. Македонија не смее да си дозволи да ја изгуби довербата во европските институции поради поединци кои го претворија земјоделството во извор на мито и политички влијанија.“

Македонија | пред 6 месеци

Ј.П.„Охридски Комуналец" денес го одбележа својот патронен празник ,,7-ми Ноември"

На присутните им се обрати Директорот м-р Сашо Најдески кој во своето обраќање истакна:„ Почитувани присутни,Дозволете ми на почетокот на сите да Ви го честитам денот на ослободувањето на градот Охрид, а на вработените воедно им го честитам патрониот празник на Ј.П.„Охридски Комуналец”-Охрид.Од далечната 1952 година започнува приказната за една мисија — да го направиме Охрид поубав, почист и поуреден град.Јавното претпријатие „Охридски Комуналец“ со децении е дел од секојдневието на охриѓани. Од раното утро до доцна навечер — наши екипи се грижат за чистите улици, зелените паркови и здравата околина.Формирано од страна на Советот на општина Охрид, Ј.П.„Охридски Комуналец"-Охрид денес е единствен извршител на комуналните услуги на територијата на Општина Охрид:-Собирање, транспорт и депонирање на комунален отпад-Одржување на јавна чистота-Одржување на градските паркови и зеленило, на целата територија на општина Охрид.Но нашата работа не е само чистење — таа е грижа, одговорност и љубов кон градот.Во периодот што следи, Ј.П.„Охридски Комуналец“ заедно со општина Охрид започнува нова етапа –Обновување и модернизација на возниот парк!Со нови, еколошки возила и современа опрема, ќе обезбедиме поекономично, поефикасно и еколошки одржливо работење.Нашата цел е едноставна, но голема: Чист Охрид. Зелен Охрид. Охрид на кој сите се гордееме. ”Како благодарност за континуиран допринос и непрекинат работен стаж за 30, 20 и 10 години во претпријатието, доделени се награди на 28 (дваесет и осум) вработени.

ОО | пред 6 месеци

Со воз од Драчево до центарот на Скопје само за 11 минути - проект на градските власти на Скопје

Со реализација на проектот за градски превоз, од Зелениково до центарот на Скопје ќе се патува 25 минути, а од Драчево само 11 минути.Овој проектот, чии градежни активности почнаа денеска, предвидува синхронизација на возниот ред со автобусите на ЈСП за побрз и поефикасен превоз на патниците низ градот.На настанот присуствуваа директорот на „Железници транспорт“, Синиша Ивановски, градоначалникот на Скопје, Орце Ѓорѓиевски, и министерот за транспорт, Александар Николоски, при што Ивановски изјави дека ремонтот на градскиот воз е од суштинско значење за Скопје и најави дека следната година ќе се обноват линиите до Волково, Илинден и Миладиновци.Тој го истакна и значењето на делницата од Драчево до Илинден за товарниот железнички превоз

Скопје | пред 6 месеци

Свежо цвеќе во чест на ослободувањето на Охрид

По повод 7-ми Ноември, Денот на ослободувањето на Охрид, делегација на општината предводена од градоначалникот Кирил Пецаков положи свежо цвеќе пред спомен обележјето на хероината Јасна Ристеска во село Рамне, каде што се одржа панихида и културен настан подготвен од најмладите од ЈОУДГ „Јасна Ристеска“.Градоначалникот Кирил Пецаков положи свежо цвеќе и пред спомен обележјата на борците во Спомен паркот на револуцијата и го проследи краткиот историски час, подготвен од Сојузот на борци од Охрид и Дебрца.Делегации на Општина Охрид предводени од советниците во општинскиот Совет положија свежо цвеќе пред спомен обележјата од НОБ кај Градски гробишта, Градски парк, Основен суд, двор на СОСУ „Св. Кирил и Методиј“.

Охрид | пред 6 месеци

Велика Британија ги укина санкциите за сирискиот претседател

Велика Британија денеска ги укина санкциите за сирискиот претседател Ахмед ал Шара, еден ден по истата одлука на Советот за безбедност на Обединетите нации, во пресрет на неговата средба со американскиот претседател Доналд Трамп следната недела. Европската унија потврди дека ќе го следи истиот чекор.Во соопштението објавено на официјалната интернет-страница на британската влада се наведува дека санкциите се укинуваат и за сирискиот министер за внатрешни работи Анас Хатаб. И двајцата претходно беа подложени на финансиски ограничувања насочени против Исламската држава и Ал Каеда.Портпарол на Европската унија изјави дека одлуката на Обединетите нации ќе се одрази и на мерките на ЕУ. Велика Британија во април укина дел од санкциите кон Сирија, додека Европската унија го направи тоа во мај, но ограничувањата поврзани со оружје и безбедност остануваат во сила.Шара, порано познат под името Абу Мохамед ал Џулани, стана претседател на Сирија во јануари, откако бунтовничките сили предводени од групата Хајат Тахрир ал Шам (HTS) го соборија Башар ал Асад во брза офанзива.Шара, кој некогаш бил висок функционер во HTS и претходно поврзан со Ал Каеда, беше под санкции на ОН и Велика Британија од 2014 година – кои вклучуваа забрана за патување, замрзнување на имот и ембарго на оружје.Советот за безбедност на ОН вчера ги укина овие мерки, наведувајќи дека нема активни врски меѓу HTS и Ал Каеда. Одлуката доаѓа непосредно пред средбата на Шара со Трамп во Белата куќа за три дена.

Свет | пред 6 месеци

(Фото) Се чисти Вардариште со тешка механизација, отпадот се транспортира на Дрисла

Од синоќа почна да се чисти депонијата на Вардариште, за што градоначаникот на Гази Баба, Бобан Стефковски објави и фотографии од акцијата.СЕ ЧИСТИ И ВАРДАРИШТЕЗаедно со градоначалникот на општина Аеродром Дејан Митески бевме на депонијата Вардариште каде што бројна механизација врши чистење и транспортирање на отпадот на Дрисла.Од првиот ден, градоначалникот на Град Скопје Орце Ѓорѓиевски започна и со активности за чистење на Вардариште!Се што ветено ќе се реализираНародот го заслужува тоа

Скопје | пред 6 месеци

Пет лица уапсени – директорот на Агенцијата за финансиска го фатиле на лице место како зема мито од 400 евра, а требало да добие вкупно 50.000 евра

Пет лица се уапсени во акција спроведена под раководство на Основното јавно обвинителство за гонење на организиран криминал и корупција (ОЈО ГОКК), соопштија од Обвинителството. Меѓу приведените е и директорот на Агенцијата за финансиска поддршка во земјоделството и руралниот развој (АФПЗРР).„Вчера во попладневните часови, под раководство на јавен обвинител од ОЈО ГОКК, истражителите од Истражниот центар и полициските службеници од ОСОСК реализираа акција во која беа лишени од слобода пет лица“, наведуваат од Обвинителството.Првосомничениот, управител на приватна фирма, се товари за продолжено кривично дело „давање поткуп“ и „давање награда за противзаконито влијание, а тројца посредници – меѓу кои даночен референт од УЈП и државен службеник од Министерството за земјоделство – за „примање награда за противзаконито влијание“. Петтото лице, според Обвинителството, сторило продолжено кривично дело „примање поткуп“.Сомневањето е дека управителот на фирмата, од февруари годинава до денот на апсењето, во повеќе наврати директно или преку посредници му ветил подарок – 50.000 евра – на директорот на Агенцијата, за да обезбеди потпишување на договор за користење на финансиски средства од ИПАРД програмата, иако неговото правно лице не ги исполнувало условите на јавниот повик.Во текот на вчерашниот ден, директорот го потпишал договорот и примил дел од ветените пари – 400 евра, кои биле пронајдени и одземени при претресот, стои во соопштението.Обвинителството смета дека се исполнети условите за определување мерка притвор и предложи судијата на претходна постапка при Основниот кривичен суд Скопје да ја одреди за сите осомничени.

Македонија | пред 6 месеци

(Фото) Царината заплени злато, 37.500 евра, „Епл“ уреди, парфеми...

Царински службеници и мобилни царински тимови запленија 92 грама златни плочки и монети, „Епл“ уреди, 37.500 евра, цигари, парфеми и детска облека со потпис на заштитени трговски марки. Златни плочки со тежина од 53 грама и 11 златни монети со тежина од 39 грама се пронајдени при контрола на багаж на турски државјанин на излез од државата, на граничен премин Меѓународен Аеродром Скопје. Проценетата вредност на златото изнесува 538 илјади денари.Во друг случај царинските службеници од Меѓународен Аеродром Скопје при контрола на багаж на патник, македонски државјанин, кој допатувал со лет од Лондон пронајдоа два лаптопи и еден мобилен телефон од брендот „Епл“.Вкупно 37.500 евра се запленети од страна на мобилните царински тимови, во два одвоени случаи на влез во државата на граничен премин Табановце.Во првиот случај, при личен претрес на српски државјанин кој со автомобил со српски регистарски таблички се пријавил за влез во државата на граничниот премин Табановце, во џебовите од неговата јакна биле пронајдени непријавени 24 илјади евра.Согласно закон, му биле вратени 10 илјади евра, износ што може слободно да се внесе во државата, а останатите 14 илјади биле привремено задржани. Во вториот случај, во фиоката пред совозачкото седиште на автомобил со македонски регистарски таблички со кој македонски државјанин се пријавил за излез од државата на граничниот премин Блаце, биле пронајдени непријавени 25.500 евра.  Согласно законските прописи на патникот му биле вратени 2 илјади евра, износ што резидент може слободно да го изнесе од државата, додека 23.500 евра биле привремено задржани.96 кутии цигари без акцизни маркички и 34 ремени за прицврстување товар во товарни возила, се откриени во два одвоени случаи на граничниот премин Ново Село.Во првиот случај, во багажниот простор на автомобил со бугарски регистарски таблички управуван од македонски државјанин, пријавен за влез во државата, биле пронајдени 96 кутии цигари без акцизни маркички и 10 ремени за товар.Во вториот случај, во багажниот простор на автомобил со македонски регистарски таблички управуван од македонски државјанин, пријавен за влез во државата, биле пронајдени 24 ремени за товар.

Македонија | пред 6 месеци

Лишени од слобода лихвари од Кавадарци, земале над 700.000 денари за долг од 80.000 денари

На 06.11.2025 во 09:20 часот, во Кавадарци, полициски службеници од ОВР Кавадарци ги лишиле од слобода Н.С.(59) и неговиот син Р.С.(34) од Кавадарци, поради сомнение за сторено кривично дело „лихварство“ по член 260 од КЗ. Според пријавеното, во јуни 2023, 71-годишен маж од Неготино од нив позајмил околу 80.000 денари и се договориле да враќа по 20.000 денари неделно, но бидејќи не успеал да го врати земеното, постојано му пресметувале камата и му го зголемувале долгот. За целиот период, оштетениот му исплатил на Н.С. сума од над 700 000 денари.По издадена судска наредба, бил извршен претрес во домот на Н.С. и Р.С., при што се пронајдени предмети за кои постои сомнение дека се поврзани со делото. Известен бил јавен обвинител и по целосно документирање на настанот ќе биде поднесена соодветна пријава.

Македонија | пред 6 месеци

Ударот на Трамп врз мигрантите, 278.000 апсења од почетокот на мандатот – 66.000 лица во притвор

Бројот на притворени мигранти во американската Служба за имиграција и царина (ICE) оваа недела се искачи на 66.000, што претставува нов рекорд откако претседателот Доналд Трамп ги засили мерките против нелегалната имиграција.Како што пренесува „Си-Би-Ес“ (CBS), повикувајќи се на интерни податоци од Министерството за домашна безбедност (DHS), САД досега никогаш немале толку голем број лица во притвор кои чекаат депортација.Од почетокот на вториот мандат на Трамп во јануари, бројот на притворени мигранти е зголемен за речиси 70 отсто – од околу 39.000 на сегашните 66.000.Претходниот рекорд бил забележан во 2019 година, за време на првиот мандат на Трамп, кога во притвор се наоѓале околу 56.000 лица. ICE во своите установи ги задржува странците кои престојуваат во земјата без дозвола или се соочуваат со депортација, сè додека нивните случаи не се завршат – освен ако не бидат ослободени со кауција или од хуманитарни причини.Според изјава на американски функционер за CBS, ICE моментално располага со капацитет од околу 70.000 кревети, во споредба со 41.500 на почетокот на мандатот. Бројот може дополнително да порасне, бидејќи агенцијата доби 45 милијарди долари преку законот „One Big Beautiful Bill“ за проширување на притворските капацитети, со план да достигне до 100.000 места во иднина.Интерните податоци на Министерството за домашна безбедност покажуваат дека околу половина од притворените – приближно 33.000 лица – немаат никакви кривични пријави или осуди, туку се задржани исклучиво поради имиграциски прекршоци.Од почетокот на вториот мандат на Трамп, ICE спроведе околу 278.000 апсења, односно просечно по 965 дневно, додека вкупниот број на апсења, вклучувајќи ги и оние извршени од царинските и пограничните служби, надминува 520.000.

Свет | пред 6 месеци